新モンゴル高等学校へようこそ
ерөнхий боловсролын шинэ монгол сургууль
SHINE MONGOL HIGH SCHOOL

Хөдөлмөр зуслан

Хөдөлмөр зуслан

Хөдөлмөр зуслан маань Төв аймгийн Баянчандмань сумын Доргонотын ам хэмээх газарт байрлах бөгөөд, хотоос 75 км-ийн зайтай оршино. Тог цахилгаангүй, утасны сүлжээ барихгүй, морин тэргээр усаа зөөх гэх мэт нөхцөлийг зориуд бүрдүүлсэн нь тэдэнд ажил хөдөлмөрийн үнэ цэнийг ойлгуулах, байгаль орчноо хайрлан хамгаалах, мөн бие дааж амьдрах чадвар нь нэмэгдэх зэрэг сурагчийн хүмүүжил төлөвшилтөд өндөр ач холбогдолтой юм.

Зорилго:

Зусланд амрах нь манай сургуулийн сургалтын чухал хөтөлбөрүүдийн нэг юм. Хичээл гэдэг эрдэм мэдлэгт суралцах үйл ажиллагааг голчилдог, дугуйлан секц нь авьяас чадварыг нээн хөгжүүлэхийг чухалчилдаг бол зуслангийн энэ хөтөлбөр нь сурагчдад мал аж ахуй, газар тариалан зэрэг хөдөө аж ахуйн орчин нөхцөлд амарч ажиллах замаар ажлын эв дүй, тэсвэр хатуужил суулгах, бие даан ажиллаж амьдрах чадварт суралцуулах зорилготой.

Хөдөлмөр зусланд сурагчдын зуны амралтын хугацаанд 6-12-р ангийн сурагчид хамрагдах бөгөөд 1 ээлжинд 40 хүртэлх хүүхэд 5-10 хоногийн хугацаатай амарна.

2014 оны зун хөдөлмөр зусланд амарсан сурагчдын фото зураг энд дарж үзнэ үү

Бэлгэ тэмдэг


Сургуулийн бэлгэ тэмдэг нь монголчуудын эртнээс эрхэмлэн ирсэн нар, сарыг дүрсэлсэн дэвсгэр дээр Шинэ Монгол гэдэг үгийн толгой үсгийг монгол эвхмэл бичгээр бичсэн байдалтай байна. Суурь өнгө нь мандан бадрахын бэлгэдэл улаан, цэвэр ариун сүүн сэтгэлийн бэлгэдэл цагаан өнгөний хослол байна. Сургуулийн туг нь хөрст дэлхийг бэлгэдсэн ногоон суурь өнгөн дээр сургуулийн бэлгэ тэмдгийг голлуулж, доор нь Ерөнхий боловсролын Шинэ Монгол сургууль гэж бичсэн байна. Хичээлийн шинэ жилийн нээлт, хаврын төгсөлтийн баяр болон сургуулиас зохион байгуулж буй уралдаан тэмцээн, сургалт хүмүүжлийн аливаа арга хэмжээнд сургуулийн тугийг тайз болон ёслолын талбайд байрлуулна. Сургуулийн туг манай сургуулийн цог хийморь, амжилт бүтээлийн бэлгэдэл тул газарт тавихгүй хүндэтгэлтэй хандана.

Шинэ Монгол сургуулийн сүлд дуу ♪

Хөгжмийг Д.Эрдэнэбаяр Шүлгийг М.Буянтогтох
Наран улсын итгэл тээж
Номын ариун хур буулгасан
Ирэх цагийн эрдмийн орой
Идэр насны мөнхийн дуулал
   Дахилт:      
Шинэ Монгол, Шинэ Монгол
Азийн зүрхэнд ассан гал
Шинэ монгол, шинэ монгол
Алдраа өргөсөн манай сургууль
Буурал түүхийг алтаар ширээж
Баян Монголд алдраа өргөсөн
Залуу насны эрдмийн гараа
Замбуулинг багтаах эрдмийн өргөө
Дахилт:      
Бумбын сайхан орныхоо
Буяныг дагаад сансарт цойлсон
Алтан соёмбоо тэнгэрт мандуулж
Ариун үйлсээр цацлаа өргөнө
Дахилт: